Voter List Search Guide: निवडणुकांचे वारे वाहू लागले की प्रत्येक नागरिकाच्या मनात दोन मुख्य प्रश्न असतात: “मतदार यादीत माझं नाव आहे का?” आणि “माझ्याकडे व्होटर आयडी नाहीये, मग मी मतदान करू शकेन का?”
लोकशाहीच्या या उत्सवात तुमचा सहभाग निश्चित करण्यासाठी केंद्र आणि राज्य निवडणूक आयोगाने आता अनेक गोष्टी सोप्या केल्या आहेत. चला तर मग जाणून घेऊया, मतदानाशी संबंधित या महत्त्वाच्या गोष्टी.
मतदार यादीत तुमचं नाव घरबसल्या कसं शोधाल?
आता मतदार यादीत नाव पाहण्यासाठी तुम्हाला कोणत्याही कार्यालयात जाण्याची किंवा मतदान केंद्रावर चकरा मारण्याची गरज नाही. तुम्ही तुमच्या मोबाईलवरून खालीलप्रमाणे नाव तपासू शकता:
- अधिकृत संकेतस्थळ: राज्य निवडणूक आयोगाच्या mahasecvoterlist.in या वेबसाईटला भेट द्या.
- मोबाईल ॲप: गुगल प्ले स्टोअरवरून निवडणूक आयोगाचे ‘मताधिकार’ (Matadhikar) हे अधिकृत ॲप डाऊनलोड करा.
- शोधण्याची प्रक्रिया: ॲप किंवा वेबसाईटवर ‘Search by Name’ हा पर्याय निवडा. त्यानंतर तुमचे पूर्ण नाव, जिल्हा आणि तुमच्या महानगरपालिकेचे किंवा मतदारसंघाचे नाव टाका.
- माहिती मिळवा: नाव सर्च केल्यानंतर तुम्हाला तुमचा प्रभाग (Ward), मतदान केंद्राचा पत्ता आणि तुमचा यादीतील अनुक्रमांक मिळून जाईल.
व्होटर आयडी (EPIC Card) नसेल तर काय करावे?
अनेकदा मतदारांचे ओळखपत्र हरवलेले असते किंवा काही कारणास्तव ते उपलब्ध नसते. अशा वेळी गोंधळून जाण्याचे कारण नाही. निवडणूक आयोगाच्या नियमानुसार, तुमचे नाव मतदार यादीत असणे सर्वात महत्त्वाचे आहे.
जर तुमचे नाव यादीत असेल, तर केवळ ‘व्होटर आयडी’ नाही म्हणून तुम्हाला कोणीही मतदानापासून रोखू शकत नाही. अशा वेळी तुम्ही खालीलपैकी कोणताही एक पुरावा दाखवून मतदान करू शकता.
मतदानासाठी ग्राह्य धरली जाणारी १२ पर्यायी ओळखपत्रे
निवडणूक आयोगाने मतदानासाठी एकूण १२ ओळखपत्रांना मान्यता दिली आहे. तुमच्याकडे मूळ मतदार ओळखपत्र नसेल, तर यातील कोणताही एक पुरावा सोबत ठेवा:
- आधार कार्ड (Aadhaar Card)
- पॅन कार्ड (PAN Card)
- भारतीय पासपोर्ट (Passport)
- ड्रायव्हिंग लायसन्स (Driving License)
- बँक किंवा पोस्ट ऑफिसचे फोटो असलेले पासबुक
- मनरेगा जॉब कार्ड
- कामगार मंत्रालयाचे आरोग्य विमा स्मार्ट कार्ड
- फोटो असलेले निवृत्तीवेतन (Pension) कागदपत्र
- सरकारी कर्मचाऱ्यांचे सेवा ओळखपत्र (केंद्र/राज्य किंवा सार्वजनिक उपक्रम)
- खासदार/आमदार यांना जारी केलेली अधिकृत ओळखपत्रे
- युनिक डिसॅबिलिटी आयडी (UDID) – दिव्यांग व्यक्तींसाठी
- NPR अंतर्गत RGI कडून जारी केलेले स्मार्ट कार्ड
मतदानाला जाण्यापूर्वी ‘ही’ खबरदारी घ्या
- यादीत नाव तपासा: मतदान केंद्रावर गेल्यावर नाव नसेल तर वेळ वाया जाऊ शकतो, म्हणून आजच ऑनलाईन नाव तपासा.
- ओळखपत्राची मूळ प्रत: शक्यतो ओळखपत्राची ओरिजनल कॉपी सोबत ठेवा, जेणेकरून पडताळणी लवकर होईल.
- वेळेचे नियोजन: गर्दी टाळण्यासाठी सकाळी लवकर मतदान करणे सोयीचे ठरते.
मतदान करणे हा केवळ आपला हक्क नाही, तर ते आपले कर्तव्य आहे. ओळखपत्र नाही म्हणून घरात बसून राहू नका. वरीलपैकी कोणताही एक पुरावा घ्या आणि आपला मौल्यवान मतदानाचा हक्क नक्की बजवा. लक्षात ठेवा, तुमचं एक मत देशाचं भवितव्य बदलू शकतं!
